Contrato expansion Aeropuerto


Contrato expansion Aeropuerto

NACO ta gana e contrato di diseño pa expansion di Aeropuerto Internacional Reina Beatrix yama “Gateway 2030”
AAA lo cuminsa un proyecto di mehoracion di 200 miyon dollar pa acomoda e fluho creciente di pasahero, pa duna mihor servicio y pa yega e metanan di sostenibilidad

ORANJESTAD - Aruba Airport Authority N.V. (AAA) a otorga un contrato di diseño na NACO, Netherlands Airport Consultants, parti di Royal HaskoningDHV, pa reconstruccion y expansion di Aeropuerto Internacional Reina Beatrix cu actualmente ta na su capacidad maximo, manehando un fluho di pasahero di 2.6 miyon pa aña. E proyecto lo hisa e capacidad di aeropuerto y pon’e riba e mapa mundial como un aeropuerto moderno, ofreciendo US Preclearance. E proyecto ta balora na alrededor di 200 miyon dollar y construccion lo cuminsa na 2018.

NACO lo duna servicio di e diseño y desaroyo general pa aeropuerto su plannan di expansion y reconstruccion. Como asesor principal e organizacion lo guia e proceso di diseño y proceso di destaho cual nan ta premira di ehecuta den e añanan nos dilanti. E proyecto, Gateway 2030, ta e prome crecemento importante den aeropuerto su capacidad desde aña 2000. Actualmente aeropuerto ta opera na su capacidad maximo. E fluho di pasahero a casi triplifica den e añanan recien, mientras cu aeropuerto a gana premionan durante e ultimo añanan manera Routes Americas 2016 y Airport Service Quality 2016. 

Mehoracion di e experencia di e pasahero
E parti mas importante di e proyecto di reconstruccion lo ta e facilidadnan di check-in nobo y expandi, e sistema nobo di maleta y mehoracion di e proceso di control di seguridad pa un sistema segun e standardnan di EDS TSA pa pasaheronan cu ta biaha pa Merca. E sistema nobo di maleta lo inclui tambe un sistema di clasifica cu lo percura cu aeropuerto lo por haci check-in di vuelonan cu no ta bay Merca tambe den e mesun facilidad. Asina eficiencia y uso di aeropuerto su capacidad lo wordo mehora. Cu e facilidadnan nobo aki pasaheronan lo experiencia filanan menos largo y tempo mas cortico pa check-in, asina mehorando e nivel di servicio brinda durante oranan druk.

Mas berde y mas sostenibel
Pa minimalisa e marca di aeropuerto riba medio ambiente e proyecto lo wordo registra pa wordo certifica bou di e sistema LEED Silver. Esaki lo ensera caracteristicanan di diseño cu lo inclui energia berde produci dor di panelnan solar. E equipo di diseño lo incorpora un sistema automatico di e edificio pa coriente y airco basa riba e ocupacion di e edificio. Un estudio solar lo determina e construccion di e murayanan y daknan pa evita efecto solar mientras lo maximalisa e luz di dia pa un experiencia placentero pa e pasahero.

Gateway 2030 ta diseña y dirigi na alivia aeropuerto su restriccionnan di capacidad, e experiencia di e pasaheronan y e sostenibilidad pa asina pone aeropuerto riba un caminda pa crecemento continuo pa e decadanan nos dilanti. Durante e periodo di 2017 – 2020 AAA lo bay inverti un total di 300 miyon dollar. “Nos ta hopi contento di por cuminsa cu e proyecto di expansion hunto cu NACO pa asina crea un aeropuerto cu Aruba lo por ta orguyoso di dje. Nos tin tur confiansa cu hunto cu NACO su experticio nos lo garantisa un aeropuerto expandi mas berde y mas ameno pa e pasahero cu lo mehora specialmente e experiencia di e pasahero cu ta bay Merca na e unico aeropuerto di Aruba”, segun CEO di AAA Sr. James Fazio. 

Asina cu e proyecto ta cla pasaheronan lo benificia tambe di 3 porta di avion mas y dos terminal di bus adicional percurando asina pa un manheo di  fluho di pasahero mas lihe pa nan avion y for di nan avion ora di yega. Tambe lo tin un seleccion mas amplio di tienda y lugarnan pa come y bebe, mas espacio pa pasahero circula y otro servicionan.

Paul Govaerts, Director di NACO: “Nos ta spera cu gran expectacion di por continua nos relacion di hopi aña cu AAA. Nos equipo di diseño ta ofrece un combinacion di hopi experticio mundial y local pa expande e aeropeurto, y asina crea un mihor experiencia pa e pasaheronan y tambe impulsa e desaroyo economico den e region.”